Gənc şair Həsən Zeynallının (Həsən Kür) vəziyyəti hələ də ağır-stabil olaraq qiymətləndirilir.

Bu sözləri Kult.az-a açıqlamasında Sabunçu Tibb Mərkəzinin mətbuat katibi Səkinə Yusifli Həsən Kürün durumu ilə bağlı deyib.

Səkinə Yusifli bildirib ki, Həsən Kür hələ də komadan ayılmayıb:

“Xəstə reanimasiyada süni nəfəs aparatına qoşulmuş vəziyyətdədir. Özünə gəlməsi üçün həkimlərimiz tərəfindən bütün zəruri yardımlar göstərilir. Hazırda gözləyirik və ümid edirik ki, xəstənin durumunda müsbət dinamika müşahidə olacaq”.

Qeyd edək ki, fevralın 22-i gənc şair, Aprel savaşının və İkinci Qarabağ müharibəsinin iştirakçısı Həsən Kür intihara cəhd edib, “Sevinc Moll” ticarət mərkəzinin 3-cü mərtəbəsindən özünü atıb. O, həmin gün 19:10 radələrində müştərək travma diaqnozu ilə Sabunçu Tibb Mərkəzinə hospitalizasiya olunub. Qapalı kəllə-beyin travması, sol bud sümüyünün qapalı sınığı, kəllə sümüyünün sınığı diaqnozu ilə ona zəruri tibbi yardımlar göstərilib. Hazırda Cərrahi profilli reanimasiya şöbəsində müalicəsi davam etdirilir.