“Qarabağ”ın UEFA Çempionlar Liqasının əsas mərhələsindəki sonuncu rəqibi – İngiltərənin “Liverpul” klubu futbolçusu Endrü Robertsonla yollarını ayırmağa yaxındır.

Axar.az Teleqraf-a istinadla xəbər verir ki, Mersisayd təmsilçisi şotlandiyalı müdafiəçini “Tottenhem”ə satmağa razılaşıb.

London klubu da öz növbəsində 31 yaşlı oyunçu ilə müqaviləni razılaşdırıb.

Robertsonun “Liverpul” forması ilə son oyunu məhz “Qarabağ”a qarşı olacaq. “Qırmızılar”ın onun üçün bu matçda xüsusi banner hazırlayacağı gözlənilir.

Qeyd edək ki, Endrü Robertson 2017-ci ildən “Liverpul”un şərəfini qoruyur. O, ümumilikdə bu klubla 363 oyunda meydana çıxıb, 12 qol vurub və 63 məhsuldar ötürmə edib. Robertson “Liverpul”la iki dəfə İngiltərə Premyer Liqasını, 1 dəfə İngiltərə Kubokunu, iki dəfə İngiltərə Liqa Kubokunu, 1 dəfəİngiltərə Superkubokunu, 1 dəfə UEFA Çempionlar Liqasını, 1 dəfə UEFA Superkubokunu və 1 dəfə FIFA Klublararası Dünya Çempionatını qazanıb. Onun klubla müqaviləsinin müddəti iyunun 30-na qədərdir.

Xatırladaq ki, “Liverpul” - “Qarabağ” qarşılaşması yanvarın 28-də baş tutacaq.