Albaniyanın Baş naziri Edi Rama Serbiya səfərini təxirə salıb.

Axar.az "Lenta.ru"ya istinadən xəbər verir ki, Rama 14 oktyabrda Serbiya-Albaniya arasında baş tutan Avro-2016-nın seçmə mərhələsi matçında baş verən qalmaqala görə səfərindən imtina edib.

Balkan yarımadasının iki ölkəsinin Baş nazirləri 22 oktyabrda görüşməli idilər, ancaq telefon danışığının gedişatında səfər 10 noyabr tarixinə keçirilib.

Baş nazirlər regionda sabitliyin qorunması üçün birgə imkanlardan istifadə edilməsinin qaçılmaz olduğunu vurğulayıblar.

Xatırladaq ki, Avro-2016-nın seçmə mərhələsi çərçivəsində keçirilən Serbiya - Albaniya oyunu yarımçıq dayandırılıb. Buna səbəb azarkeşlərin hərəkəti olub. İlk hissənin sonlarında Albaniyanın bayrağını uçurublar. Meydan sahiblərinin müdafiəçisi Stefan Mitroviç tullanaraq bayrağı yerə salıb. Bundan sonra komandaların futbolçuları arasında mübahisə yaranıb. Serbiyalı azarkeşlər fayerlər yandıraraq meydana atıblar. Nəticədə görüş qeyri-müəyyən müddətə dayandırılıb.