Noyabrın 6-da Avropa Liqasının qrup mərhələsində "Dnerp"lə qarşılaşacaq "Qarabağ" oyunun hazırlıqlarını davam etdirir.

Axar.az xəbər verir ki, komandanın bugünkü məşqindən sonra baş məşqçi Qurban Qurbanov danışıb. O, Qol.az-ın suallarını cavablandırıb:

- İstədiyimiz kimi hazırlaşmağa bir o qədər vaxtımız yoxdu. Çempionat oyunları sıx qrafikdə keçirilir, sadəcə, iki gün vaxtımız var idi. Dünən ilk məşqimiz keçirildi.

İki qrupda hazırlıq prosesi oldu: oynayanlar və oynamayanlar. Bu gün də bir az fərqli qruplarla məşqimiz oldu. Çalışırıq, oyuna kimi komandanı tam hazır vəziyyətə gətirək.

Mən "Dnepr"lə oyundan sonra da bildirdim ki, arxayınlaşmamalıyıq. Əlbəttə, səfərdəki qələbə bizi sevindirir. Amma bu o demək deyil ki, biz qarşıdakı oyunların hamısında qalib gələcəyik. Əsas məqsədimiz gələcək matçlara yaxşı hazırlaşmaqdır.

Biz əlimizdən gələni əsirgəməyəcəyik. Amma qələbələrə aldanmamalıyıq. Bəzən bir uğuru çox böyüdürük. Unutmayaq ki, Azərbaycan kiçik futbol ölkəsidir, biz hələ yeni-yeni Avropa komandalarına qarşı normal oynamağa başlamışıq. Qarşıdakı oyunlara ciddi yanaşmalı və yaxşı hazırlaşmalıyıq".