Fevralın 7-də Azərbaycan Premyer Liqasının 20-ci turunun "Qarabağ" – "Bakı" oyunu keçirilməyə bilər.

Axar.az xəbər verir ki, paytaxt klubu üzləşdiyi maddi problemlər səbəbindən futbolçulara maaş verə bilmir. Bu səbəbdən komandanın üzvləri hazırkı vəziyyətdən narazıdır və onlar "Qarabağ"la oyuna çıxmamaq qərarı veriblər.

"Bakı"nın icraçı direktoru Yaşar Seyidov "Qol.az"a matçın baş tutacağı ilə bağlı qəti fikir söyləməyib və ehtiyatlı danışıb.

"Futbolçuları da başa düşmək olar. Onlar maaş almadıqlarına görə narazıdırlar. Oyuna hələ iki gün var. Biz də ümid edirik ki, oyuna qədər futbolçuların maaş məsələsində az da olsa irəliləyiş ola bilər", - deyə Y.Seyidov bildirib.

Y.Seyidov qeyd edib ki, maddi vəziyyətdə dəyişiklik olmasa, komandanın çempionatda çıxışını davam etdirməsi sual altında olacaq:

"Bakı" klubundakı maliyyə problemləri artıq heç kimə sirr deyil. Çətinliklərimiz çoxdur. Artıq mətbuatda məni qınayırlar ki, bu çətinlikləri ört-basdır etməklə məşğulam. Vəziyyət düşündüyünüzdən də pisdir. Lakin ümid sonda ölür. Hələ də problemin həllinə ümid edirik".

Qeyd edək ki, klubun rəhbəri iş adamı Hafiz Məmmədovdur.