"Türklərə oyun verməyimizdən söhbət belə gedə bilməz. Onlara bu lazım deyildi, həmin dövrdə çox güclü komanda idi. Təsadüfi deyil ki, sonradan dünya üçüncüsü oldular.

Bu cür güclü komanda gəlib bizə oyun verməyimiz üçün yalvara bilər? Tərlana kim nə deyib, bilmirəm. Amma federasiya prezidenti kimi mənə nə türklər, nə də hansısa deputat tərəfindən heç bir müraciət olmayıb, ola da bilməz. Axı deputat kimdir ki, mənə göstəriş versin?"

Bu sözləri komanda.az-a AFFA-nın sabiq prezidenti Fuad Musayev deyib. Federasiyanın keçmiş rəhbəri 2002-ci ildə Türkiyə ilə seçmə oyunda Azərbaycanın qəsdən uduzması haqda ittihamı rədd edib.

F.Musayevin sözlərinə görə, burdakı oyunda biz türklərə qalib gəlməliydik: "Sadəcə, o vaxt türk futbolçular meydanda təxribata əl atdılar. Onlar bizim oyunçuları provakasiyaya sövq etdilər.

Türkiyə mediasında bizim haqqımızda mənfi fikirlər formalaşmışdı. Onlar millilərinin avtobusunun burda daşa basılmasından yazırdılar. Bizim onlarla nə birinci, nə də ikinci oyunun verilməsilə bağlı danışığımız olub".

Sabiq prezident qeyd edib ki, Türkiyə o zaman Slovakiya ilə oyunda xal itirdikdən sonra vəziyyəti gərgin idi: "Bakıda Slovakiyanı məğlub etdik. Bu, onlara çox kömək etdi. Oyundan sonra mənə zəng edərək dəfələrlə təşəkkür etdilər. Bizim onlara köməyimiz ancaq bundan ibarət oldu. Yoxsa hansısa oyun verməkdən söhbət belə gedə bilməz".