Serbiya mətbuatının gülünc iddialarına ayrılası vaxtım yoxdur.

Axar.az xəbər verir ki, bu sözləri "Qarabağ"ın alban futbolçusu Ansi Aqolli deyib.

Albaniya millisinin üzvü "Qol.az"a Ermənistanın oyunu onlara satması haqda iddialara münasibət bildirib:

"Bu, Serbiya mətbuatının Albaniya millisinin təmiz uğuruna kölgə salmaqdan başqa bir şey deyil.

Elə həmin mətbuat daha əvvəl bildirirdi ki, Belqradda Albaniya ilə oyunda heç bir hadisə baş verməyəcək.

Amma mənfi hadisə baş verdi, feyr-pley qaydaları pozuldu. Amma onlar hələ də bildirirlər ki, Serbiyada bizə qarşı təzyiq olmayıb".

Xatırladaq ki, Serbiyanın "Telegraf.rs" nəşri Ermənistanın Albaniyaya matçı satdığını iddia etmişdi. Məlumata əsasən, Ermənistan yığmasının 4 futbolçusu - 3 müdafiəçi və qapıçı - oyundan qabaq hər birinə 500 min avro alıblar.

Oktyabrın 11-də İrəvanda keçirilən matç albanların 3:0 hesablı qələbəsi ilə bitib. Bu nəticə ilə Albaniya Avropa Çempionatına birbaşa vəsiqə qazanıb.