Bu məsələni biz valyuta bazarında da müşahidə etdik. Dekabr ayında Mərkəzi Bank üzən məzənnə rejiminə keçəndən sonra görünür, müəyyən insanların institusional yaddaşları çox güclüdür, 90-cı illərdə olduğu kimi artıq fəaliyyətə keçdilər.

Axar.az xəbər verir ki, bu sözləri Azərbaycan Mərkəzi Bankının İdarə Heyətinin sədri Elman Rüstəmov deyib.

Onun sözlərinə görə, bəziləri manatın məzənnəsinin süni surətdə aşağı düşməsi və dolların daha da bahalaşmasından qazanc məqsədilə istifadə etmək istədi:

"Bütövlükdə bunu süni yaradılmış və çox vaxt bankların nəzarətində olmayan valyutadəyişmə məntəqələrində müşahidə etdik və bütün valyutadəyişmə məntəqələrini ləğv etdik. Ona görə ki, bu məsuliyyət bilavasitə bankların və bank şöbələrinin üzərində olsun.

Bütövlükdə məsələnin kökü nədir? - Paralel bazar bir sıra inkişaf etmiş ölkələrdə də var. Hətta çox böyük nəzarətə baxmayaraq, paralel bazar SSRİ dövründə də mövcud idi".