"Neftçi"nin Mətbuat və İctimaiyyətlə Əlaqələr Departamentinin rəhbəri Gündüz Abbaszadə feysbuk səhifəsində yazdığı statusda bu həftə baş tutacaq "Böyük Oyun"un yayımlanmaması ilə bağlı "Xəzər Lənkəran" rəhbərliyini günahlandırıb.

"Axar.az" Gündüz Abbaszadənin statusunu təqdim edir:

"Çox maraqlıdır, hamı "Böyük oyun" deyir. Böyük oyun isə yayımlanmayacaq. Əminəm ki, bu məsələdə "İdman Azərbaycan" kanalının zərrə qədər "günahı" olsaydı, indi mətbuat susmayacaqdı. Azarkeşlərimizi "Böyük oyun"suz qoymaq istəyən isə bu dəfə "Xəzər Lənkəran" tərəfidir. Açıq danışmaq lazımdır, əvvəlki illərdə klublar yayım üçün TV-yə xahiş-minnət edirdilər. Hətta yayım üçün tələb olunan texniki xərcləri belə, klublar ödəyirdi. İndi PFL və Topaz yayım üçün hər şəraiti yaradıb. Pulsuz-parasız... Bəs niyə mane oluruq? "Yayım üçün kluba pul ödənilməlidir" iddiası bəhanədən başqa bir şey deyil. İndi yadınıza düşdü? "Dünən"ə qədər yayım üçün pulu ödəyən siz idiniz axı?! Mustafa Dənizlidən soruşun, zəhmət olmasa, Türkiyədə başqa oyunu demirəm, "Beşiktaş" - "Konyaspor" oyunu yayımlanmasa, ictimaiyyət nə reaksiya verərdi? Təsəvvür belə etmək çətindir".