Xarici valyutada kredit götürmüş şəxs aylıq borcu manatla ödəyəndə məbləğ bankın həmin günə müəyyən etdiyi məzənnə ilə hesablanır.

Axar.az xəbər verir ki, müştəri rəsmi məzənnəyə uyğun ödəniş etmək istəsə də, qanun buna yol vermir.

Mərkəzi Bankın qərarına əsasən, banklar xarici valyutanı rəsmi məzənnədən 4 faiz aşağı və ya yuxarı hədlə alıb-sata bilər. Bu çərçivədə məzənnənin müəyyənləşdirilməsi qismən sərbəstdir. Kredit ödənişi vaxtı da bankın təyin etdiyi məzənnəyə uyğun məbləğ qəbul olunur.

Bu hal vətəndaşların etirazına səbəb olsa da, banklar qanunvericiliyə uyğun hərəkət edir. Ancaq vətəndaş pulunu krediti ödədiyi bankda konvertasiya etdirməyə bilər.

Xəzər-xəbər-in məlumatına görə, ekspertlər ay ərzində gündəlik məzənnələri izləməyi tövsiyə edir. Növbəti ödənişə qədər dolların ən ucuz olduğu gün manatı bu valyutaya dəyişib saxlamaq, ödəniş günü isə banka təqdim etmək olar.