Bəzi banklar dollarla olan kreditləri manata çevirmək təşəbbüsü ilə çıxış etsələr də, əksər banklar buna getməkdə maraqlı deyillər. Çünki onların valyuta mövqeyi buna imkan vermir.

Axar.az xəbər verir ki, bu haqda iqtisadçı ekspert Samir Əliyev açıqlama verib. Ekspert dollar kreditlərinin manata konvertasiyası mexanizmlərindən biri kimi Mərkəzi Bankın nəzdində Problemli kreditlər üzrə Fondun yaradılması təklifini irəli sürüb:

"Fondun əsas məqsədi bankların kredit portfelinin yaxşılaşdırılmasını təmin etməkdir. Mərkəzi Bank Fondun kapitallaşması üçün manat vəsaiti ayırır. Fond da öz növbəsində kommersiya banklarına uzun müddətə (20 il), aşağı faizlə (illik 3%) depozit yerləşdirir. Həmin depozitlər dollar kreditlərinin yenidən maliyyələşdirilməsinə yönlədilir və dollar kreditlərinin manata konvertasiyasını təmin edirlər. Qazaxıstanda oxşar mexanizm ipoteka kreditlərinə münasibətdə tətbiq edilir. Eyni zamanda, depozitlərin dollarlaşma səviyyəsinin də aşağı salınması barədə addımlar atılmalıdır. Söhbət manatla qoyulan əmanətlərə MB tərəfindən məzənnə zəmanətinin verilməsindən gedir".