Cari ildə əcnəbilərin Türkiyədə etdiyi alış-verişin həcmi açıqlanıb.

APA xəbər verir ki, məlumatları "Global Blue Türkiye" şirkəti təqdim edib.

Şirkətin baş direktoru Selim Şeyhun bildirib ki, siyahının ilk pilləsində Səudiyyə Ərəbistanı qərarlaşıb. Belə ki, Səudiyyə Ərəbistanı vətəndaşları hesabat dövründə Türkiyədə 45,3 mln. lirəlik alış-veriş edib. İkinci yerdə Küveyt (35,3 mln. lirə), üçüncü yerdə İran (33,2 mln. lirə), dördüncü yerdə Çin (23,6 mln. lirə) qərarlaşıb.

İlk beşliyi Azərbaycan qapayır: Belə ki, Azərbaycan vətəndaşları bu ilin ilk yarısında qardaş ölkədə 18,7 mln. lirə (9 mln. manat) xərcləyib. "Ölkəmizə səfər edən Azərbaycan vətəndaşları orta hesabla 2165 lirə (1044 manat) məbləğində xərc çəkib", - deyə şirkət rəhbəri qeyd edib.

Bundan başqa, Azərbaycan vətəndaşları Türkiyədə ən çox saat və qızıl-zinət əşyaları alanların sırasındadır. Ümumi alışların 6%-i məhz Azərbaycan vətəndaşlarının payına düşür.