"Azərbaycanın dövlət büdcəsini 19 milyard manat gəlir, 20 milyard manata yaxın isə xərc təşkil edir. Bunun 27%-i sosial , 32%-i isə investisiya layihələridir. İnvestisiya layihələrinin 1.3 milyardı Avropa ilə əlaqədardır. Yəni təxminən 1 milyard manat Bakı-Qars dəmiryolunun çəkilməsinə daxildir".

Bunu Axar.az-a Milli Məclisin İqtisadi siyasət daimi komissiyasının üzvü, millət vəkili Vahid Əhmədov 2015-ci il üçün dövlət büdcəsi ilə bağlı layihələr barədə açıqlama verərkən deyib.

Onun sözlərinə görə, əsas məsələlərdən biri neftin qiyməti ilə bağlıdır.

Vahid Əhmədov bildirib ki, neftin qiyməti 90 dollar nəzərdə tutulsa da, 2015-ci il üçün 80 dollar səviyyəsində götürülsə, daha yaxşı olar:

"Əgər büdcədə əlavə vəsait yaradılarsa, qiymətin 90 dollar olmasına baxmaq olar. Ümumi götürdükdə, büdcənin göstəriciləri müsbətdir. Dövlət Neft Fondundan 10.3 milyard transfer var, bu da büdcənin təxminən 51 faizini təşkil edir. 2015-ci il üçün dövlət büdcəsində sosial layihələr yerinə yetirilərsə, heç bir problem və sıxıntı olmayacaq; hesab edirəm ki, yetiriləcək də. Çünki 53 milyard dollarlıq ehtiyat fondumuz var. Ancaq yenə də neftin qiyməti ilə bağlı ehtiyatlı davranmaq lazımdır".

Millət vəkili noyabrın 16-17 də Milli Məclisin plenar iclasında müzakirə ediləcək əsas məsələlərə də toxunub:

"Təkliflərimiz neftin qiyməti, ipoteka kreditləri, bizim seçildiyimiz dairələrlə əlaqədar yaranan bir neçə problemlərlə bağlı məsələlər olacaq. O ki qaldı Dövlət Sosial Müdafiə Fondunun 2015-ci il büdcəsinə, keçən ilə nisbətən vəziyyət indi daha yaxşıdır. Çünki transfer 40-42 milyon manat az olub. Dövlət Sosial Sığorta Fonduna yığılmalara nəzarət daha da gücləndirilib. Yığılma böyükdür. Ona görə dövlət büdcəsindən transferi azaltmaq lazımdır. Ən əsas məsələ isə yerli xərclərlə bağlıdır ki, burda da müəyyən qədər azalma var. Əvvəl beş şəhər idisə, indi 6-cı - İmişli rayonunun da tam maliyyə təminatı ilə bağlı irəliləyişlər var. Buna görə də hesab edirəm ki, 2015-ci il dövlət büdcəsi üçün hər hansı problem gözlənilmir".