ABŞ birja indeksləri bu gün keçirilən sessiyada böyük enmə yaşayıb.

Musavat.com xəbər verir ki, “Dow Jones” indeksi 2,42 faiz, S&P 500-2,46% aşağı düşüb. Bunun nəticəsində iri bankların səhmlərində də böyük çöküş yaşanıb. “Bank of America” səhmləri 4,3%, “Citigroup”un hissələri isə 5,1% dəyər itirib.

İqtisadi analitiklər bunu sərmayədarların bankların şirkətlərə verdikləri kreditlərdən gəlir götürə biləcəyinə olan inamsızlığı ilə izah edirlər.

CNBC kanalının verdiyi məlumata görə, pərakəndə satış nəhənglərindən sayıılan “Macy`s” şirkətinin səhmləri birdən-birə 17 faiz enib.

Burada firmanın kifayət qədər yüksək gəlir göstəricilərinə malik olmaması xüsusi rol oynayıb.

Bundan daha öncə iqtisadçılar ABŞ-ın istiqraz və borc bazarında anomaliyaların müşahidə olunduğunu qeyd etmişdilər. Belə ki, qısamüddətli iki illik dövlət istiqrazlarının gəlirliliyi onillik istiqrazların gəlirlərindən önə keçib. Belə bir hal 1978-ci ildən bu yana müşahidə olunur və adətən qlobal durğunluğun və böhranın xəbərçisi rolunda çıxış edir.

Bu, onunla izah olunur ki, investorlar emitentlərin (qiymətli kağızları buraxan təşkilat və şirkətlər-red) iflas etməsindən qorxaraq öz qısamüddətli aktivlərini uzunmüddətli perspektivə yatırırlar. Nəticədə qısa müddətli səhmlərin gəlirlərində artış hiss edilsə də, bu, qiymətli kağız bazarında böhrana gətirib çıxarır.