27 mayda neft qiymətləri ucuzlaşıb – bu, OPEK+ ölkələrinin neft hasilatını artıracağı gözləntilərinin fonunda baş verib.

Axar.az xəbər verir ki, bu barədə “Röyters” məlumat yayıb.

Qeyd olunub ki, “Brent” markalı neftin fyuçersləri 24 sent ucuzlaşaraq bir barrel üçün 64,50 dollar, yüngül neft isə 29 sent ucuzlaşaraq 61,24 dollar olub.

Nəşrin yazdığına görə, OPEK+ yaxın zamanda gündəlik hasilatı 411 min barrel artırmağı təsdiqləyəcək. Qrup, yəqin ki, hasilat kvotaları ilə bağlı son qərarı 28 mayda onlayn keçiriləcək nazirlər görüşündə verəcək. Bununla belə, Rusiya Baş nazirinin müavini Aleksandr Novak bildirib ki, ölkələr hələ hasilatın artırılmasını müzakirə etməyib.

Qeyd olunub ki, OPEK+ üzvləri artıq ardıcıl iki dəfə hasilatı artırıblar. Bu da neftin qiymətində nəzərəçarpacaq ucuzlaşmaya səbəb olmalı idi.

Bununla yanaşı, ABŞ Prezidenti Donald Trampın Avropa Birliyi ilə ticarət danışıqlarını 9 iyula qədər uzatmaq qərarı neft qiymətlərinin kəskin ucuzlaşmasının qarşısını alıb. Analitiklər bildirirlər ki, AB və ABŞ arasında “gömrük müharibəsi” dünya üzrə yanacağa olan tələbatı azalda və nəticədə neftin ucuzlaşmasına səbəb ola bilərdi.

Neft qiymətlərinə dəstək verən digər amil isə ABŞ və İran arasında nəticəsiz qalan nüvə danışıqlarıdır. Əgər bu danışıqlar uğursuzluqla nəticələnsə, bu, İrana qarşı sanksiyaların davam etməsi və beləliklə də İran neftinin ixracında məhdudiyyətlər demək olacaq ki, bu da qiymətləri yüksəldəcək.

Qeyd edək ki, analitiklər ilin sonunda “Brent” markalı neftin bir barrelinin 60 dollardan ucuz olacağını proqnozlaşdırırlar.