Ermənilərin lavaşı beynəlxalq mədəniyyət mirası siyahısına "erməni çörəyi" olaraq təqdim etməsi 5 dövləti hərəkətə gətirib.

Axar.az xəbər verir ki, Türkiyə, Azərbaycan, İran, Qırğızıstan və Qazaxıstan lavaş üçün birlikdə sənəd hazırlayaraq UNESCO-ya təqdim edib.

5 ölkənin hazırladığı "Zərif çörək hazırlama və paylaşma mədəniyyəti: lavaş, qatırma, yuxa, yayma" sənədi ilə bağlı veriləcək qərarın tarixi də müəyyən olub. Sənədlə əlaqədar yekun qərar 28 noyabr-2 dekabr 2016-cı ildə Efiopiyada keçiriləcək Qeyri-məlum Mədəni Miras 11-ci Hökumətlərarası Komitə Yığıncağında veriləcək.

Türkiyə Mədəniyyət və Turizm Nazirliyi səlahiyyətlilərindən alınan məlumata görə, Ermənistan lavaşı UNESCO-ya ilk dəfə "Ermənistan çörəyi - lavaş" adı ilə təqdim edib. Komitədə söz sahibi olan Türkiyə sənədin adının milli sahiblik daşıdığını ifadə edərək buna etiraz edib. Türkiyə və Azərbaycanın etirazlarından sonra sənədin adı dəyişdirilərək "Ermənistanda lavaş" adlanıb.

5 ölkənin hazırladığı ortaq sənəddə isə "Zərif çörək hazırlama və paylaşma mədəniyyəti: lavaş, qatırma, yuxa, yayma" lavaşın bu coğrafiyada yaşayan xalqların ortaq mədəni irsi olduğu vurğulanıb.