Gənc Markeslə söhbət: 45 il yubanmış müsahibə

"Yüz il tənhalıqda" romanına görə Nobel mükafatı almış Markes çox vaxt "magik realizm" adlandırılan özünəməxsus üslubu ilə məşhurdur. Bu üslubun səciyyəvi cəhəti real və uydurma olayların möcüzəvi ustalıqla çulğaşmasıdır.

Həftəlik elektron qəzet "Wikers Weekly" Markesin çox "qədim", lakin heç vaxt dərc olunmamış müsahibəsini yayımlayıb. Bu müsahibədən keçən müddətdə yazıçının baxışları dəyişmişdimi? Bilmirik. Amma bu söhbətin görkəmli yazıçının portretinin hansısa çizgisini tamamlayacağına söz yoxdur. Odur ki, Axar.az həmin müsahibəni oxucularına çatdırmağı lazım bilir.

Bir nəfərdən başqa

60-cı illərin sonlarında, daha dəqiq desək, 1969-cu ildə insanın Aya ilk uçuşundan əvvəl İspaniyanın Barselona şəhərində 45 broşürdən ibarət "Kainatda özgə ad altında yaşayan siklop" (siklop - yunan əsatirində təpəgöz, div sutərləridir – tərc.) seriyası çıxır. (Ciclope la incognita del espacio).

Bu nəşrlər ufologiya, UNO-lar, kainatdakı digər sivilizasiyalar, kosmosdakı gələcək insan məsələlərinə həsr olunmuşdu. Redaksiyanın tərkibində Latın Amerikasından olan jurnalistlər öz həmvətənlərinin gənc yazarlarından müsahibələr almışdılar. Onların həmsöhbətlərinin demək olar ki, hamısının adları artıq çoxdan unudulub, bir nəfərdən başqa... Dünya şöhrətli Qabriel Qarsiya Markesdə başqa.

Onların məqsədi Yer deyil

- UNO haqqında nə düşünürsünüz?

- Mənim UNO haqqındakı düşüncələrim, ola bilsin ki, bir qədər sağlam düşüncənin fövqünə qalxsın. Hesab edirəm ki, UNO-lar mövcuddurlar və başqa planetlərdən uçub gəlirlər, lakin onların məqsədi Yer deyil.

- Digər planetlərdə həyatın mövcudluğuna inanırsınız?

- Bizim planetin yeganə məskunlaşmış planet olmasını iddia edənlərin təkkəbbürü təəssüf doğurur. Fikrimcə, biz daha çox, kainatın ucqar bir əyalətindəki kənd kimi unudulmuşuq və əsrlərin gecələrindən keçən parlaq disklər insanlara biz toyuqlara baxdığımız kimi baxır.

- Necə fikirləşirsiniz: onlar haradan gəlirlər və ya onları kimlər göndərir?

- UNO-nun ekipajı, çox güman ki, bizimkindən daha geniş və səmərəli bioloji imkanlara malik varlıqlardan təşkil olunur. Onlar bizimlə əlaqəli deyillər, çünki bizim öyrəndiklərimizi min illər bundan əvvəl kainat üzərindəki sonuncu tədqiqatları zamanı öyrənib bitiriblər. Onlar nəinki bizim haqqımızda özümüzdən də çox bilirlər, hətta bizim taleyimiz də onlara bəllidir. Əslində yer onlar üçün sadəcə kosmik naviqasiyada nəzərə alınan adalar kimi bir maneədir.

- Sizcə, ictimaiyyət bu predmetlər haqqında lazımınca bilgiləndirilibmi?

- UNO haqqında həqiqətləri bizlərdən gizlətmək barədə böyük dövlətlərin müqaviləsi olduğunu güman etmirəm. Bu, o demək olardı ki, bu dünyanın böyükləri əslində olduqlarından daha ağıllıdırlar.

- Bəs bəzi alimlərin Yer kürəsi xaricində kosmik sivilizasiya və gəmilərin mövcudluğunu inkar etməsinə necə aydınlıq gətirə bilərsiniz?

- Həyat elə alınıb ki, bəşər övladı gələcəyi görə bilməyə layiq görülməyib. Odur ki, biz mürtəce elmin, kobud doqmatizmin hakimiyyəti altındayıq. Əgər yadplanetliləri burda, yanımızda, stolun üstündə, kimya kolbasında görə bilmiriksə, demək, sübut da edə bilmərik. Haqqında danışdığınız insanlar marslıların mövcudluğunu inkar edən köhnə fikirli mürtəce alimlərdir. Onlar bu varlıqları gözləri ilə görmədikləri üçün inkar edirlər, hətta heç ağıllarına da gəlmir ki, bəlkə bu marslılar elə bədənimizdəcə bizimlə mübarizə aparmağa qadir gözlə görünməyən mikroblardır.

Nə vaxta qədər ki, elmimiz bəsirət gözünü yumub, eksperimentlər yolu ilə gedəcək bəşəriyyət korlar səltənəti olaraq qalacaq. Ağzımızı açıb hələ Bibliyanın yazıldığı zamanlardan mövcud olan işıq saçan diskləri izləyəcək və onların varlığını danacağıq. Çünki onların heyəti keçmişlərdə dəfələrlə baş verdiyi kimi düşüb bizimlə nahar etmir. Çünki biz Kainatın ən ucqar, mürtəce və geridə qalmış planetinin sakinləriyik.