Tanınmış yazıçı Kamal Abdullanın "Bir... iki...
bizimki..." pyesi əsasında hazırlanan "Səsimdən yapış" tamaşasının
premyerası keçirilib.
Axar.az xəbər verir ki, Yuğ Dövlət Teatrının səhnəsində
premyerası keçirilən yeni tamaşanın quruluşçu rejissoru Gümrah
Ömərdir. Tamaşada əməkdar artistlər Məmməd Səfa, Gülzar Qurbanova,
İrəvan Dövlət Dram Teatrının aktyorları Ceyhun Əliyev, Solmaz
Məmmədova, Şəbnəm Cəbrayılova rol alıblar. Tamaşanın quruluşçu
rəssamı Əməkdar rəssam Rəşid Şerif, geyim üzrə rəssamı Leyla
Əliyeva, musiqi tərtibatçısı Ramiq Mehdidir.
"Bu gündən etibarən çox istedalı, böyük yazıçımız, həmmüasirimiz
Kamal Abdullanın "Bir... iki... bizimki..." pyesi əsasında
hazırlanan "Səsimdən yapış" tamaşası teatrsevərlərin ixtiyarına
verildi. Tamaşa çox incə, həyatı qədər vacib olan bir mövzuya -
ölüm mövzusuna həsr olunub. Əlbəttə, bu məcazi mənadadır. Ölümü
insanlar nə qədər qorxulu, nə qədər ağrılı, eyni zamanda, bir
ayrılıq məqamı kimi qavrayırlarsa, məlum olur ki, Kamal Abdulla
ölümün başqa yeni keyfiyyətlərini ortaya qoyub. Hesab edirəm ki,
həyatımız üçün səmərəli olan bu mövzu haqqında insan həmişə
düşünməlidir", - deyə quruluşçu rejissor Gümrah Ömər tamaşa
haqqında danışarkən bildirib.