Marsa gedərdim, daha göz yaşları görmək istəmirəm

Bildiyiniz kimi, Holland şirkəti "Mars One" Marsa səyahət təşkil edir. "Mars One" təşkilatı 2018-ci ildə başlayacaq bir layihə üçün 200 mindən çox insanın müraciət etdiyini açıqlayıb. Marsda davamlı yaşamaq üçün şərait qurmaq istəyən "Mars One" qurumu ilk göndərdiyi qrupdan 4 nəfərə ömürlük Marsda yaşamaq, geri qayıtmamaq şansı verəcək.

Marsa getmək üçün müraciət edənlər arasında Türkiyə vətəndaşları da var. Azərbaycandan da belə bir səfərə çıxmaq istəyənlərin olub-olmadığını öyrənmək istədik.

Arvad-uşağı qoyub heç Rusiyaya getmək olmur

Köşə yazarı Zamin Hacı bu layihənin nağıl olduğunu dedi: "Mən Qoç bürcüyəm, himayədarım Mars planetidir. Ən azı ona görə getmək istəyərdim. Rey Bredberinin "Mars xronikaları" da vaxtilə çox sevdiyim əsər olub. Amma indiki halda arvad-uşağı qoyub heç Rusiyaya getmək olmur, gəl gör Mars olsun. Həm də o layihə daha çox nağıldır. İndi Marsa adam göndərməyə texniki imkanlar yoxdur".

Haqsızlıq yorub mәni

Bakı Uşaq Teatrının direktoru və bədii rəhbəri İntiqam Soltan başa düşülməməkdən bezdiyini bildirdi: "Gedәrdim, çünki yerdә işlәrimi bitirmişәm... Bir az teatrım vә ailәm üçün darıxacam, o da anlaşılandı! Haqsızlıq yorub mәni, daha göz yaşları görmək istəmirəm, başa düşülmәmәkdәn bezmişәm, yerin cazibә qüvvәsi amansızdı..."

Nə Marsa, nə Yupiterə...

Yazar Elçin Mirzəbəyli qeyd etdi ki, Marsa getmək üçün heç bir tutarlı əsas görmür: "Nə Marsa, nə Yupiterə, nə də başqa bir planetə gedərdim. Sevdiyim insanlardan bir neçə günlüyə ayrılanda belə, mənim üçün dözülməz olur. Marsa getməyə heç bir tutarlı əsas görmürəm".

Gözümü qırpmadan gedərdim

Tarix elmləri namizədi Altay Göyüşov: "Mars yaşamalı yer deyil, güllü çiçəkli, cənnət kimi bir yer olsaydı, gedərdim".

Yazar Kənan Hacı bildirdi ki, gözünü qırpmadan gedərdi: "Əgər həmin Holland şirkəti doğrudan da belə bir xeyirxah iş görərsə, mən gözümü qırpmadan gedərdim. Səbəbi də odur ki, bu planetdə yaşamağı bacarmadım, bəlkə orda nəsə etdim. Həm də bu dünyanın adamları məni çox yorub".

Yerdən tək mən olmaq şərti ilə...

Şairə, yazar Sevinc Çılğın Bakı üçün "sino getdiyini" bildirdi: "Mənim Marsda nə itim azıb? Mən Zahirsiz nəfəs ala bilmərəm. Bakı üçün də "sino gedirəm".

"Yeni Müsavat" qəzetinin redaktoru Elşad Məmmədlisə bildirdi ki, Marsa yalnız bir halda, dönməmək şərti ilə gedərdim ki, ora məndən başqa Yerdən kimsəni aparmasınlar. Yerdəki adamların xislətinə, necə deyərlər, dabbaqda gönünə bələd olduğum üçün onlarla birlikdə Marsda yaşamaq, elə Yerdə yaşamaq kimi bir şey olacaq. Səbəbə gəlincə, Yerdən bezdiyim üçün Marsa gedərdim, amma dediyim kimi, Yerdən tək mən olmaq şərti ilə".

"Qanun" nəşriyyatının direktoru Şahbaz Xuduoğlu fikrini çox səmimi şəkildə, qısa və konkret bildirdi: "Marsa bir az tərəddüd edirəm, amma Venera olsaydı, məmnuniyyətlə gedərdim".

Yəqin ki Marsda qızılgül yoxdur...

REAL Hərəkatının İdarə Heyətinin üzvü Natiq Cəfərli qətiyyətlə getmək istəmədiyini dedi: "Yox, getmərəm, 2018-də Cümhuriyyətin 100 illiyidir, bunu Azərbaycanda qeyd etmək, burada Cümhuriyyəti bərpa etmək istəyirəm".

Yazar Cəlil Cavanşirin cavabı isə onun obrazına nisbətən çox optimist oldu: "Mən təkliyi, adamsızlığı sevən adamam. Ömürlük Marsda qalmağı isə seçmərəm. Çünki bu gəzəgəndə missiyamı başa vurmamışam. Belə bir şansım olsa, getməzdim. Elə adamlar var ki, onların səsini həftədə bir dəfə eşitməsəm, dəli olaram. Bir də qızılgül qoxusu. Yəqin ki, Marsda qızılgül yoxdur..."

Sorğudan belə bəlli oldu ki, getmək istəyənlərin sayı istəməyənlərdən azdır. Demək ki, biz öz Yerimizi Marsa dəyişmədik.