8 dekabr - Beynəlxalq Rəssamlar Günündə Bakı Xətai Sənət Mərkəzində tanınmış rəssam Natiq Camal Afşarın Nizami Gəncəvinin əsərlərinin motivləri əsasında rəsmlərindən ibarət sərgisi keçirilib.

Kult.az xəbər verir ki, sərgi Milli Məclisin Mədəniyyət Komitəsinin, “Avrasiya Beynəlxalq Araşdırmalar İnstitutu” İB, “Regional Hüquqi və İqtisadi Maarifləndirmə” İB, “NƏFƏS” İB, Masallı Təhsil Fondunun dəstəyi ilə baş tutub.

Sərgidə Natiq Camal Afşarın dahi Nizaminin əsərlərinin motivləri əsasında çəkdiyi miniatür əsərlər sərgilənib.

Milli Məclisin Mədəniyyət Komitəsinin sədri Qənirə Paşayeva sərginin açılış mərasimində geniş çıxış edib.

Beynəlxalq Rəssamlar Günü münasibəti ilə müəllifin, sərgidə iştirak edən rəssamların timsalında bütün rəssamları təbrik edən Q.Paşayeva öz çıxışında sərgi və müəllifin yaradıcılığı haqqında bilgilərini bölüşüb, bir sıra məslələrə toxunub.

Tədbirdə millət vəkilləri Razi Nurullayev, Könül Nurullayeva, keçmiş millət vəkili Əsmətxanım Məmmədova, qardaş Türkiyənin Yunus Əmrə İnstitutu Bakı nümayəndəliyinin rəhbəri Səlcuq Karakılıç çıxış edib, ürək sözlərini bölüşüblər.

Qeyd edək ki, sərgidə 20-dən artıq əsər nümayiş olunub. Əsərlərin hamısı tədbirdə iştirak edənlər tərəfindən satın alınıb. Q.Paşayeva bildirib ki, alınan əsərlər qardaş Özbəkistan, qardaş Türkiyədə, eləcə də digər türk ölkə və topluluğunda Nizami Gəncəvi irsinə uzunmüddətli diqqəti, marağı ilə seçilən ünvanlara göndəriləcək, nüfuzlu nizamişünaslara, Azərbaycan dostlarına hədiyyə olunacaq.