Məşhur türk rejissor Zəki Dəmirkubuz yeni "Ürəkbulanma" filmini Jan Pol Sartrın eyniadlı əsəri əsasında çəkib-çəkməməsinə aydınlıq gətirib.

Axar.az türk mətbuatına istinadən xəbər verir ki, Dəmirkubuz mətbuata yeni filmiylə əlaqədar bunları deyib:

"Filmin mövzusunun Jan Pol Sartrın məşhur romanı olan "Ürəkbulanma" ilə heç bir əlaqəsi yoxdur. Amma aralarında belə bir bağ var: 7 il əvvəl "çəkə bilərəmmi?" düşüncəsiylə Sartrın romanı üzərində işləməyə qərar verdim, kompüterimdə "Ürəkbulanma" adında bir fayl açdım, amma bir müddət sonra bu fikrimdən imtina edib filmi indiki halına saldım.

Vaxt məhdudluğundan filmə yeni bir ad tapa bilmədim, digər adlar da xoşuma gəlmirdi, "Ürəkbulanma"ya öyrəşdiyimdən və sevdiyimdən filmin adı elə də qaldı. Onsuz da filmlərimə ad tapmaqda həmişə çətinlik çəkmişəm".

Qeyd edək ki, Zəki Dəmirkubuz bundan əvvəl rus yazıçı Fyodor Dostoyevskinin "Yeraltından qeydlər" kitabı əsasında film çəkib.