İtaliyada bu il 72-ci dəfə təşkil edilən Beynəlxalq Venesiya Film Festivalı islandiyalı rejissor Baltazar Kormakurun "Everest" filminin nümayişi ilə başlayıb.

Axar.az xəbər verir ki, Venesiya şəhərinin Lido yarımadasında təşkil edilən dünyanın ən qədim kino festivalının açılış mərasimində iştirak edən İtaliya Prezidenti Sercio Mattarella festivalda "Qızıl aslan" üçün yarışan 4 italyan rejissorla birgə digər rejissorlara da uğur diləyib.

Festivalın açılış mərasimində "Qızıl aslan"ın sahibini müəyyənləşdirəcək münsiflər heyətində yer alan "Qızıl palma budağı" mükafatlı türkiyəli rejissor Nuri Bilgə Ceylan da oğlu Ayazla birlikdə iştirak edib. Venesiya Film Festivalında bu il 3 müxtəlif nominasiyada 3 türkiyəli rejissorun filmi təqdim ediləcək.

Festivalın qalibi sentyabrın 12-də müəyyənləşəcək.