Nəsə yazanda düşünün, sonra yazın.

Bu sözləri müğənni İzzət Bağırzadə təhqir olunması ilə bağlı Axar.az-a danışarkən deyib. Müğənni onu təhqir edənləri məhkəməyə verəcəyini bildirib:

"Məni təhqir edənləri məhkəməyə verəcəyəm. 26 ildir bu sahədə öz mədəniyyətimlə, ifamla, dinimlə, imanımla tanınmışam. Bu sahədə əziyyət çəkmişəm. Dünən izləyicilərdən biri gecə saat 4-də səhifəmdə nalayiq sözlər işlədib. Səhər tezdən durdum baxdım, çox əsəbiləşdim. Ümumiyyətlə, fikir verirəm, insanlarımız daha aqressiv olub. Bu xüsusilə də müğənnilərdə özünü göstərir. Bir şəkil paylaşırsan, müğənninin ayağına, saatına, geyiminə baxırlar ki, nəsə irad tutsunlar. Özü də bilərəkdən gecə vaxtı yazırlar ki, mən həmin an bu adama cavab verə bilməyim. Bu mənim şəxsi səhifəmdəki fikrim olub. Bunu bu dərəcədə mediada şişirtmək lazım deyildi. Siz baxardınız ki, bəzi şəxslər müğənnilər haqda hər gün nə qədər yersiz tənqidlər, söyüşlər yazır. Biz müğənnilər də insanıq, daşdan, betondan deyilik. Əlbəttə, hər insanın zəif nöqtəsi var, indi baxın, bu adam məni necə özümdən çıxarıbsa, belə ifadələr işlətmişəm. Burdan bütün izləyicilərimə səslənirəm ki, nəsə yazanda öncə düşünün, sonra yazın. Məni təhqir edən şəxsi məhkəməyə verəcəyəm. Hər kəs cəzasını çəksin".

Qeyd edək ki, dünən İzzət Bağırzadə rəsmi İnstaqram səhifəsində müğənni Sevda Sanəliyeva ilə fotosunu paylaşıb. Daha sonra sənətçinin izləyiciləri ona təhqir dolu sözlər yazıblar. Müğənnin həmin şəxsə qarşı küçə söyüşləri işlətməsi mətbuatda böyük rezonans doğurub.