Axar.az-ın növbəti qonağı, qalmaqallı rejissor Kənan Mahmudovdur. Kənan bəyin bu aralar qolu çıxsa da, bizə zaman ayırıb, suallarımızı cavabsız qoymadı.

Vüqar mənim üçün rəqib deyil

- Kənan bəy özünüzü necə hiss edirsiniz?

- Allah bundan betərindən qorusun. Bu sualı əgər qolum çıxan gün versəydiniz, heç də yaxşı deyiləm deyərdim. Amma indi şükür ki, yaxşıyam.

- "Ulduzların döyüşü" layihəsində, müğənni Nicat Rəhimovla başladınız və qalib oldunuz. Növbəti döyüşünüz isə "Yeni ulduz" layihəsindən tanıdığımız Vüqar Muradovla rinqə çıxdınız. Bu dəfə isə nəticə ürəkaçan olmadı. Vüqar Muradov "Ulduzların döyüşü" layihəsinin qalibi oldu. Bu, necə baş verdi? Bir az bu haqda danışaq.

- Vüqar Muradov mənim üçün rəqib deyil. Çünki mən dünya çempionları ilə oturub-dururam. İdman mənim xarakterimə, canıma hopub. İstəsəm də, istəməsəm də həyatımın tərkib hissəsi olub idman. Dostum Emil Hacıyev 9 dəfə dünya çempionu olub. Dörd dəfə dünya çempionu olanda idmandan getmək istədi, mən qoymadım. Demişəm ki, qanında var, qayıt. İdmana meylli olsam da, nədənsə rejissorluğa daha çox üstünlük verdim. O ki qaldı layihədə uduzmağıma, 30 saniyənin söhbəti oldu. Vüqar da əlini vicdanına, kitabına qoyub deyə bilər ki, mənə qalib gəlmədi. Ortada görüntü deyilən sübutlar var ki, o mənə qalib gəlmədi. Sadəcə, qolum çıxdı deyə, məni oyundan uzaqlaşdırdılar. Oyundan uzaqlaşdıranda isə, avtomatik olaraq oyun Vüqara qaldı.

- Bildiyimiz qədərilə Vüqar oyundan sonra sizə və sizin ailənizə zəng edib halallıq alıb, hətta ağlayıb.

- (Gülür) O, bilirsiniz niyə ağlayırdı? Sevindiyindən... inanmırdı ki, oyundan qalib çıxa bilər. Onun hisslərin başa düşürəm və hörmətlə yanaşıram. Vüqar Azərbaycan oğludur. Onun ailəsinə və şəxsiyyətinə zərrə qədər də sözüm yoxdur, ola da bilməz. Sadəcə, həmin layihədə dostluq qalib gəldi. Başqa heç nə ola bilməz. Amma bundan sonra Vüqarla 10 dəfə döyüşə çıxsam, 11 dəfə udaram.

- Dostlardan birinə demisiniz ki, mən Vüqarı çox istəyirdim, hörmətim var idi, amma kövrəlib ağlamağından sonra onu yenidən kəşf etdim.

- Bəli, həqiqətən də onun kövrək olduğunu kəşf etdim.

Mən meyxana deyəndə...

- Kənan bəy, siz idmançı, eyni zamanda da rejissorsunuz. Bu yaxınlarda sizin ifanızda meyxana eşitdim. Meyxana hara Kənan MM hara?

- Mənim nənəm şairə olub və bu istedad mənə nənəmdən keçib. O ki qaldı meyxana deməyə, mən meyxana deyəndə, heç Namiq Qaraçuxurlu meyxana demirdi. Meyxana deməyim, ədəbiyyata olan marağımdan irəli gəlir. Lakin bu o demək deyil özümü meyxana aləmində görürəm.

- Bir çox şerlərin müəllifisiniz. Bu vaxta qədər həyat yoldaşınıza həsr etdiyiniz şeir olub heç?

- Olub, "İstanbul" şerini həyat yoldaşıma həsr etmişəm.

- Yeni olaraq, hansı işləriniz var?

- "Bozbaş Pikçers"ə bədii film çəkirəm, ssenarisi mənə məxsusdur.

Qələt etdilər, başlarını da, daşa döydülər

- Mərhum Hüseyn Dəryanın ölümündən sonra, çoxları sizi qınadı. Onun ölümündən istifadə edib efirdə özünü reklam edir kimi sözlər deyildi. Bu haqda nə deyə bilərsiniz?

- Qələt etdilər, başlarını da daşa döydülər, - belə də yazın. İmam Əli buyurub: "Haqqı söyləməyən axmaqdır". Mən özümü axmaq saymıram, nə gördümsə, onu da dedim. Kim də inciyir, incisin.

- Cahangir Dərya ilə görüşürsünüz?

- Bəli, görüşürəm. Sonuncu dəfə mayın 30-da son zəng günü görmüşəm. Hal-hazırda İstanbuldadır deyə, görə bilmirəm, amma mesaj vasitəsilə yazışırıq.

- Fikrinizcə, niyə sizi gözü götürmiyənlərin sayı çoxdur?

Bu haqda danışmaq istəmirəm

- Adəm yaranandan bu günə qədər, haqqın tərəfdarı hər zaman az olub. İmam Əli buyurub: "Əlinin içində firuzə qaş olsa, ətrafdan sənə desələr ki, o firuzə qaş deyil, çürük qozdur, sən rahat ol. Çünki Allah da bilir ki, o, firuzədir". İnsan güzgüyə baxanda özünü tanıyır, ətrafım, dostlarım və ailəm məni tanıyırsa, bu mənə yetərlidir. Əgər kiminsə gözü məni götürmürsə, demək ki, Allah yaratdığı varlığı gözü götürmür.

- Bayaqdan Həzrəti Əlinin hədislərindən sitat gətirirsiniz. İbadətlə məşğul olursunuz?

- Bu haqda danışmaq istəmirəm.

- Artıq Ramazan ayı başlayır, oruc tutmaq fikriniz var?

- Bəli, inşallah.

- Şer yazırsınız. Bu vaxta qədər hansı müğənnilər sizin sözlərinizə mahnı oxuyublar?

- Nüşabə Ələsgərli "Sındı aramızda olan körpülər", Nazpəri Dostəliyeva "Ayrılıb gedirəm, mən bu şəhərdən", "Ləkə" filminin, "Pərvanələrin rəqsi" serialının saundtreki və sair.

Qadın olaraq, zövqümdə deyil

- Kənan Mahmudov müğənni olsaydı, kiminlə duet oxumaq istəyərdi?

- Sami Yusiflə.

- Niyə məhz Sami Yusif?

- Çünki dini mahnılar oxuyur, insanın ruhunu oxşayır.

- Qadın müğənnilərdən kimi seçərdiniz?

- Şakiranı.

- Qadın olaraq bəyənirsiniz, ya necə?

- Xeyir, sadəcə ifa tərzini bəyənirəm. Qadın olaraq mənim zövqümdə deyil.

- Başınıza gələn bir hadisəylə sağollaşaq...

- Bir dəfə bir toyda idim. Tamada məni guya tanıyır (gülür). Mənə söz verir danışmağa. Başladı məni təqdim etməyə: "Gəlsin mənim dostum-qardaşım, canım-ciyərim Kənan M.Quliyev (gülür)..." Aqil M.Quliyevlə mənim remiksim. Mənim adımla, onun soyadını qarışdırıb. Çox güldük, yəni belə hallar çox olur.