Görürsünüz ki, artıq efirə də çıxmıram. Sentyabra qədər bu barədə heç bir məlumat verməyəcəm.

Bu sözləri Kult.az-a müğənni Təranə Qumral (Təranə İbrahimova) həbs ediləcəyi ilə bağlı yayılan xəbərlərə münasibət bildirərkən deyib. O, haqqında səsləndirilən ittihamlarla bağlı danışmaq istəmədiyini söyləyib.

Qeyd edək ki, criminal.az saytı T.Qumralın 3 ilədək azadlıqdan məhrum edilə biləcəyini yazıb. Belə ki, müğənni 2016-cı ildə həmkarı Nazənin Salayeva ilə olan məhkəmə çəkişməsində qanuni qüvvəyə minmiş məhkəmə qərarını icra etməməkdə təqsirləndirilir.

İşin baxılması Nərimanov rayon Məhkəməsinin hakimi Rəşad Abdulovun icraatına verilib. İş üzrə zərərçəkənlər müğənni Nazənin Salayeva, Məhəbbət Həsənov və Pərviz Abbasovdur. Məhkəmənin hazırlıq iclası mayın 29-na təyin olunub.

T.Qumrala Cinayət Məcəlləsinin 306.1-ci maddəsi ilə ittiham irəli sürülüb. Həmin maddəyə görə, T.Qumral 3 ilədək azadlıqdan məhrum edilə bilər.

Zərərçəkənin vəkili Ceyhun Yusifov faktı təsdiqləyib.