Uşaqlıq illərimdən bir epizod yadıma düşdü. Xatırlayıram ki, ayaqqabılarımın altı deşilərdi. Yenisini almaq imkanımız olmadığından özümü günahkar sayardım.

Axar.az xəbər verir ki, bu sözləri aparıcı-müğənni Murad Arif uşaqlıqda yaşadığı çətinlik haqda rəsmi İnstaqram səhifəsində yazıb. O, həmin günləri ağrı ilə xatırladığını bildirib:

"Hesab edirdim ki, ayaqqabımın altının deşilməsi mənim səliqəsiz rəftarımın nəticəsidir. Halbuki o ayaqqabılarım xalam uşaqlarının köhnəsi idi. Hər ayaqqabımın pəncəsində bir barmağın rahat keçəcəyi ölçüdə yırtıq olardı. Mən də ayaqqabının içliyi ölçüsündə karton, ya da linoleum kəsib ayaqqabının içinə sərərdim. Ayağım su olmasın deyə, anamın toxuduğu corabların üstündən sellofan da geyinirdim. Rahat deyildi... O vaxtdan soyuğu, qışı sevmirəm. Ən birinci də ayaqlarım üşüyür".