Son illər Heydər Əliyev Fondunun dəstəyi və təşkilatçılığı ilə Azərbaycanda çoxsaylı mədəniyyət layihələri həyata keçirilir. Bu mədəniyyət tədbirlərindən olan Qəbələ Beynəlxalq Musiqi Festivalı öz möhtəşəmliyi ilə musiqisevərlərin rəğbətini qazanıb.

Axar.az xəbər verir ki, iyulun 30-dan başlayaraq qədim Qəbələ şəhəri Heydər Əliyev Fondunun möhtəşəm beynəlxalq layihəsi olan bu musiqi festivalına yenidən ev sahibliyi edəcək. Avqustun 5-dək davam edəcək festivalda Azərbaycandan və xarici ölkələrdən görkəmli musiqiçilər, bədii kollektivlər, solistlər, dirijorlar iştirak edəcəklər.

Hazırda VIII Qəbələ Beynəlxalq Musiqi Festivalının keçiriləcəyi ərazidə ciddi hazırlıq işləri görülür. Rayon icra hakimiyyətinin, idarə və təşkilatların birgə səyi ilə Qəbələnin küçələrində, park və bağlarında abadlıq işləri həyata keçirilir, gecə işıqlandırma sistemi qaydaya salınır, şəhərdə səliqə-sahman yaradılır.

Qəbələ şəhərinin küçələrində, İsmayıllı-Qəbələ-Şəki avtomobil yolunun kənarına, müxtəlif otel və istirahət mərkəzlərinə festivalla bağlı yerləşdirilən plakatlar diqqəti xüsusilə cəlb edir. Əhalinin bu festivala olan marağını artırmaq üçün Bakı, Qəbələ, Şəki, Şamaxı, İsmayıllı və Gəncənin mərkəzi meydanlarına, park və küçələrinə xüsusi plakatlar quraşdırılıb, müxtəlif broşürlər paylanılıb. Bundan əlavə, festivalın keçiriləcəyi Heydər Əliyev Konqres Mərkəzinin böyük zalında, eləcə də qonaqların yerləşəcəyi beşulduzlu "Qafqaz Resorte" və "Qafqaz Riverside" otellərində hazırlıq işləri başa çatmaq üzrədir. Hazırda Heydər Əliyev Konqres Mərkəzinin qarşısında açıq hava altında keçiriləcək konsertlər üçün möhtəşəm səhnə quraşdırılır.

Qeyd edək ki, proqrama uyğun olaraq festivalın açılış mərasimində Xalq Artisti Rauf Abdullayevin dirijorluğu ilə Üzeyir Hacıbəyli adına Azərbaycan Dövlət Simfonik Orkestri çıxış edəcək. İyulun 31-də Vyana Akademik Orkestri səhnəyə çıxacaq. Orkestrin bədii rəhbəri Martin Haselblokdur. Həmin gün tamaşaçılar İspaniyanın "Suite Española" şirkətinin təqdimatında flamenkoya da baxa biləcəklər. Avqustun 1-də təqdim ediləcək konsertdə Fərhad Bədəlbəyli (fortepiano), Murad Adıgözəlzadə (fortepiano), Janna Qandelman (skripka), Dmitri Yablonski (violonçel) çıxış edəcəklər. Yunanıstanın folklor kvarteti isə azərbaycanlı xanəndələr Güllü Muradova, İlkin Əhmədov, habelə Sahib Əsədullayev (kamança), Emin Cəbrayılov (nağara), Əli Əliməmmədov (balaban) və Çinarə Heydərova (qanun) ilə eyni səhnəni bölüşəcək.

Avqustun 2-də Fuad İsmayılovun xatirəsinə musiqi proqramı təqdim ediləcək. Həmin gün Kubanın "Gənc klassiklər" ansamblı da çıxış edəcək. "Kiyev virtuozları" orkestrinin çıxışı avqustun 3-4-də olacaq. Orkestrə avqustun 3-də baş dirijor Dmitri Yablonski, habelə Emil Tabakov, 4-də isə israilli bəstəkar, dirijor və pianoçu Gil Şohat dirijorluq edəcək. Avqustun 4-də, həmçinin Cavid Səmədov (bariton), Murad Adıgözəlzadə, Nərgiz Oruclu (hər ikisi fortepiano) Umila Abbasova (skripka) və Arkadi Şilkloperin (alphorn) ifaları dinləniləcək. Festivalın sonuncu günündə - avqustun 5-də piano musiqisi axşamı təşkil olunacaq. Festival "Kiyev virtuozları" orkestrinin konserti ilə başa çatacaq.

VIII Qəbələ Beynəlxalq Musiqi Festivalı çərçivəsində avqustun 2-dən 5-dək fortepiano müsabiqəsi keçiriləcək.