Bu gün dünya şöhrətli azərbaycanlı müğənni Müslüm Maqomayevin doğum günüdür.

Axar.az xatırladır ki, SSRİ xalq artisti Müslüm Maqomayev 1942-ci il avqustun 17-sində Bakıda anadan olub. 19 yaşında Maestro Niyazinin tövsiyəsi ilə tələbə və gənclərin Helsinkidə keçirilən VIII Ümumdünya Festivalına göndərilən Müslüm Bakıya medalla qayıdır. Populyar "Oqonyok" jurnalı onun portretini və "Bakılı gənc dünyanı fəth edir" başlıqlı məqalə dərc edir.

İlk konsertini Parisin "Olimpiya" konsert salonunda verən müğənni bundan bir il sonra - 1969-cu ildə Polşada keçirilən Beynəlxalq Mahnı Festivalında ilk mükafatını alıb.

Getdikcə nüfuz qazanan Maqomayev 1975-ci ildə Azərbaycan Dövlət Estrada-Simfonik Orkestrinin bədii rəhbəri təyin edilib. Bu orkestrlə Sovet İttifaqının bir sıra şəhərləri ilə yanaşı Fransa, Bolqarıstan, Polşa, Finlandiya, Kanada və İranda konsertlər verib. O, 1970-ci illərdən həyatını estrada ilə bağlayıb və görünməmiş populyarlıq qazanıb.

O, dünyanın bir çox ölkələrində tanınıb, sevilirdi. Müslüm Maqomayev o qədər böyük idi ki, hətta SSRİ mədəniyyət naziri Yekaterina Furtseva da onu öz himayəsinə götürmüşdü.

Müğənniliklə yanaşı filmlərə də musiqi yazan Müslüm Maqomayev SSRİ-nin "Qırmızı Əmək Bayrağı" və "Xalqlar Dostluğu" ordenləri ilə təltif edilib.

Böyük sənətkar Müslüm Maqomayev 2008-ci il oktyabrın 25-də vəfat edib və Bakıda Birinci Fəxri Xiyabanda dəfn olunub.