YARAT FreeStyle və yenicə açılmış Bakı Tanqo On Məktəbi, hər kəsi Maxo Martirena və Rodriqo Fontinin iştirakı ilə möhtəşəm tanqo rəqsləri gecəsinə dəvət edir.

Axar.az xəbər verir ki, YARAT bununla bağlı özünün Feysbuk səhifəsində elan yerləşdirib.

"Təxminən bir il bundan əvvəl, Maxo Martirena (Uruqvay) və Rodriqo Fonti (Argentina) yeni yaradıcılıq səyahətinə çıxıblar. Bu səyahətdə onlar müxtəlif obrazları, onların canlandırılması yollarını davamlı şəkildə araşdırır, hər bir məqamı səmimiyyət və təravətlə dolu olan yeni rəqsləri axtarırlar.

"Biz, böyük sevgi ilə sizə tanqonun və tərəfdaşınızla "əlaqə qurmağın" bütün incəliklərini göstərməyə, tanqoda hiss etdiyimiz qeyri-adi və möcüzəli anları yaşatmağa çalışırıq. Bu anlar bizi rəqs etməyə sövqləndirir", - elanda qeyd olunub.

Gecə sentyabrın 2-də YARAT Müasir İncəsənət Mərkəzində keçiriləcək.