Bu gün Azərbaycanın görkəmli müğənnisi, SSRİ xalq artisti, Dövlət Mükafatı laureatı Zeynəb Xanlarovanın 80 yaşı tamam olur.

Axar.az xatırladır ki, o, 1936-cı il dekabrın 28-də Bakıda anadan olub. 1956-cı ildə M.Ə.Sabir adına Bakı Pedaqoji məktəbini, 1961-ci ildə isə A.Zeynallı adına Bakı Musiqi Texnikumunu bitirib.

Elə həmin ildən Opera və Balet Teatrının solisti kimi fəaliyyətə başlayan müğənni Ü.Hacıbəylinin “Leyli və Məcnun”, “Əsli və Kərəm” operalarında Leyli və Əsli obrazlarını yaradıb.

Xalq artistinin repertuarında muğam (Şahnaz, Mahur, Qatar, Bayatı-Şiraz və s.), təsnif və Azərbaycan xalq mahnıları, Azərbaycan bəstəkarlarının (Qara Qarayev, Fikrət Əmirov, Tofiq Quliyev, Cahangir Cahangirov, Arif Məlikov, Emin Sabitoğlu, Ələkbər Tağıyev) və şərq xalqlarının mahnıları geniş yer tutur.

Z.Xanlarova Azərbaycanın qadın xanəndələri arasında “Çahargah” muğamının ilk ifaçılarından biridir. O, dünyanın əksər ölkələrində uğurlu konsert proqramı ilə çıxış edib.

“İstiqlal”, “Şöhrət”, “Heydər Əliyev” ordenləri ilə təltif edilən Z.Xanlarova həm də uzun illərdir Azərbaycan Respublikası Milli Məclisinin deputatıdır.