Bu gün İsveçrənin Bazel şəhərində 69-cu “Avroviziya” beynəlxalq mahnı müsabiqəsinin ilk yarımfinalı keçiriləcək.

Kult.az xəbər verir ki, ölkəmizi yarışda "Mamagama" qrupu təmsil edir. Qrup "U ilə qaç" (Run with U) adlı mahnı ilə səhnəyə çıxacaq və 10-cu nömrə altında çıxış edəcək.

Mahnının sözləri Asəf Mişiyevə, musiqisi isə Asəf Mişiyev, Həsən Heydər və Roman Zilianevə aiddir.

İlk yarımfinalda Azərbaycanla yanaşı, Estoniya, İslandiya, Polşa, Portuqaliya, Sloveniya, İsveç, Ukrayna, Albaniya, Belçika, Xorvatiya, Kipr, Niderland, Norveç və San-Marino təmsilçiləri də mübarizə aparacaqlar.

Yarımfinalın nəticələrinə əsasən, finala yüksələcək 10 iştirakçı müəyyənləşəcək və onlar mükafat uğrunda yarışa davam edəcəklər.

Müsabiqə yerli vaxtla saat 23:00-da İctimai Televiziyada birbaşa yayımlanacaq.

Qeyd edək ki, müsabiqənin ikinci yarımfinalı mayın 15-də, böyük final isə mayın 17-də baş tutacaq.