Azərbaycandan gələn təbii qaz Türkiyə–Suriya təbii qaz kəməri vasitəsilə Suriyanın Xüms vilayətinə çatıb.

Axar.az xəbər verir ki, bu barədə “TRT Haber” məlumat yayıb.

Məlumata görə, Azərbaycan qazı artıq Xüms vilayətindəki "Cender" qaz stansiyasına çatdırılıb.

Buradan qaz paytaxt Dəməşq yaxınlığındakı Nasiriyyə və Təşrin istilik elektrik stansiyalarına yönləndiriləcək.

Suriya enerji nazirinin müavini Qeyyaz Diyab bildirib ki, hazırda gündəlik 1,4 milyon kubmetr qaz ötürülür və bu, 250 meqavat elektrik istehsalına imkan verir. Yeni razılaşma ilə həcmin gündə 6 milyon kubmetrə çatdırılması, evlərə isə gündə 8 saata qədər elektrik verilməsi planlaşdırılır.

Qeyd edək ki, Azərbaycandan Suriyaya ilk qaz axını 2 avqustda başlayıb.