İsrail Silahlı Qüvvələrinin Baş Qərargah rəisi general-leytenant Eyal Zamir Qəzzaya hücum planlarını təsdiq edib.

Axar.az xəbər verir ki, bu barədə İsrail ordusu məlumat yayıb.

“Zamir bir sıra hərbi komandirlərin və kəşfiyyat xidmətlərinin nümayəndələrinin iştirakı ilə əməliyyat müşavirəsi keçirib və o, ordunun Qəzzada fəaliyyət planının ümumi çərçivəsini təsdiqləyib”, - məlumatda qeyd olunub.

Məlumata görə, Qəzzada əməliyyatın sonrakı mərhələləri üçün planın mərkəzi konsepsiyası İsrail siyasi rəhbərliyinin göstərişlərinə uyğun olaraq təqdim və təsdiq edilib.

Baş Qərargah rəisi qoşunların hazırlığının artırılmasının və ehtiyatda olan hərbçilərin hərbi xidmətə çağırışına hazırlığın vacibliyini vurğulayıb.

Qeyd edək ki, avqustun 8-də İsrailin hərbi-siyasi kabineti Baş nazir Benyamin Netanyahunun Qəzzanın bütün ərazisinə nəzarəti ələ keçirmək üçün təklif etdiyi planı təsdiqləmişdi.