Rusiya ordusu oktyabrın 26-na keçən gecə Ukraynanın paytaxtı Kiyevə növbəti dəfə hava hücumu edib.

Axar.az xəbər verir ki, gecə saatlarında hava hücumundan müdafiə sistemi işə düşüb, partlayış səsləri eşidilib. Zərərsizləşdirilən dronlar Kiyevin bəzi yaşayış binalarında yanğına səbəb olub.

Kiyev şəhər meri Vitali Kliçko hava hücumu nəticəsində ilkin məlumata görə, 3 nəfərin öldüyünü, 29 nəfərin yaralandığını deyib. Xəsarət alanların 3-ü uşaqdır.

Onun sözlərinə görə, zərərsizləşdirilən dron paytaxtın Desnyansk rayonunda doqquzmərtəbəli binanın ikinci mərtəbəsinə düşüb. Bir neçə mənzil yanıb, yanğın dördüncü və yeddinci mərtəbələrdəki eyvanlara keçib. Artıq yanğın söndürülüb.

Digər ünvanda yerləşən doqquzmərtəbəli yaşayış binasında mənzillərin pəncərə və qapıları, altıncı və səkkizinci mərtəbələrin fasadı və tavanı qismən zədələnib. Beş nəfər xilas edilib.

Dronun qalıqları həmçinin Obolon rayonunda 16 mərtəbəli yaşayış binasının üzərinə düşüb. Bir mənzilə ziyan dəyib. Yanğın və ya konstruksiyaya ziyan dəyməyib.