Nə qədər ki, Rusiya Ukraynaya qarşı işğalçı müharibəni davam etdirir, Kreml Kiyevlə əməkdaşlıq edən ölkələri də hədəf seçəcək. Rusiyanın Kiyevdə Azərbaycan səfirliyini raket atəşinə tutması, Dövlət Neft Şirkətinin Ukraynadakı yanacaq mərkəzlərinə endirdiyi zərbələr, Odessa limanında sıxılmış qaz daşıyan Türkiyə gəmisini hədəf götürməsi, Avropa dövlətlərinin hava sahəsinə göndərilən dronlar bu “siyasətin” tərkib hissəsidir.

Axar.az xəbər verir ki, bu sözləri politoloq Elxan Şahinoğlu qeyd edib.

“Rusiya bu dəfə Polşa dəmir yolunu hədəf seçib. Rusiya kəşfiyyat xidmətləri ilə əməkdaşlıq edən Ukrayna vətəndaşları Polşada dəmir yolunu partladaraq Belarusa qaçıblar. Kreml niyə Polşa dəmir yolunu partlatmağa qərar verib? Məsələ burasındadır ki, Ukraynanın dünya ilə əlaqəsi Polşa üzərindən həyata keçirilir, müxtəlif ölkələrin rəsmiləri Polşanın dəmir yolundan istifadə edərək Ukraynaya səfərlər edirlər. Ukrayna Prezidenti Vladimir Zelenski də bu dəmir yolundan istifadə edir. Eyni zamanda Ukraynaya hərbi texnika da Polşa dəmir yolu vasitəsilə çatdırılır. Bu səbəbdən Kremlin Polşa ərazisindəki dəmir yolunu hədəf götürəcəyi gözlənilən idi. Bundan sonra həmin dəmir yolunun təhlükəsizliyinə diqqət daha da artırılmalıdır”, - o bildirib.