Bölgəmizdə baş verən hadisələr bölgə xaricindəki müəyyən güclərin qanunsuz müdaxilələri nəticəsində baş verir. İsrail rejimi müxtəlif sxemlər vasitəsilə bölgədəki ölkələri zəiflətməyə çalışır. İsrail rejiminin müharibəni qızışdırmaq niyyəti və istəyi heç vaxt azalmayıb.

Axar.az xəbər verir ki, bu sözləri İranın xarici işlər naziri Abbas Arakçı türkiyəli həmkarı Hakan Fidanla Ankarada birgə keçirdikləri mətbuat konfransı zamanı deyib.

“ABŞ heç vaxt sadiq olmayıb və vicdanla hərəkət etməyib. Buna baxmayaraq, İran bütün diplomatik proseslərə hazırdır. Biz qanuni, rasional, ədalətli və hüquqlarımıza hörmətlə yanaşan danışıqlar prosesinin tərəfdarıyıq. ABŞ-ın mövqeyində açıq-aydın ziddiyyətlər var.

Hərbi hücum mümkün deyil. Onlar ötən ilin iyun ayında hərbi hücum həyata keçirdilər və heç bir məqsədlərinə nail ola bilmədilər. ABŞ dəfələrlə müxtəlif vasitəçilər vasitəsilə bizimlə danışıqlar aparmağı tələb edib və bu tələbləri yeniləməyə davam edir.

Danışıqlarda iştirak etməkdə heç bir problemimiz yoxdur, lakin danışıqlar təhdidlərlə başlaya bilməz. Onlar təhdidlərini kənara qoymalıdırlar”, - o bildirib.