2026.02.22. 23:35

Meksikanın ən böyük narkokartellərindən biri olan "Halisko Yeni Nəsil"in lideri "El Menço" ləqəbli Nemesio Osegera Servantes silahlı qüvvələrin keçirdiyi xüsusi əməliyyat zamanı məhv edilib.

Axar.az xəbər verir ki, bu barədə "Milenio" qəzeti mənbələrə istinadən məlumat yayıb.

"Bazar günü Talpa de Allyende (Xalisko ştatı) bələdiyyəsində ordunun keçirdiyi əməliyyat zamanı cinayətkar qruplaşmanın lideri öldürülüb. Təhlükəsizlik qüvvələrinin ölkənin altı regionunda, o cümlədən Xalisko, Miçoakan, Kolima, Tamaulipas, Quanaxuato və Aquaskalientes ştatlarında keçirdiyi əməliyyatlara cavab olaraq kartel üzvləri magistral yolları bağlamağa başlayıblar.

Servantes "El Çapo" ləqəbli Xoakin Qusmanın həbsindən sonra ölkənin ən güclü narkobaronu sayılırdı", - mənbə bildirib.

***

"El Menço" ləqəbli liderinin məhv edilməsindən sonra Meksikada iğtişaşlar başlayıb.

Liderlərinin ölüm xəbərindən dərhal sonra silahlılar müharibə elan ediblər və mülki şəxsləri öldürəcəklərinə söz veriblər. Kartel üzvləri Milli Qvardiyanın bazasına hücum ediblər, ölkənin səkkiz ştatında talanlar başlayıb, Qvadalaxarada küçə döyüşləri gedir, silahlılar yük maşınlarını yandırır və yolları bağlayırlar.

Qeyd edək ki, "El Menço" ən çox axtarılan narkobaronlardan biri hesab olunurdu.