Rusiya Prezidenti Vladimir Putin Ukraynanın məğlubiyyətinin qaçılmaz olduğuna dünyanı inandırmaq üçün xeyli səy göstərib, baxmayaraq ki, bu, reallığa uyğun deyil.

Axar.az xəbər verir ki, bu barədə “Foreign Policy” (FP) nəşri yazıb.

Nəşr qeyd edib ki, Putinin ən böyük uğuru cəbhədə deyil, ictimai rəyə təsir mübarizəsində əldə olunub:

“Xüsusilə, Alyaskada Putinlə görüşdən sonra ABŞ lideri Donald Tramp dərhal atəşkəs tələbindən geri çəkilərək, Rusiyanın mütləq qalib gələcəyi barədə yanlış fikrə əsaslanaraq, Kiyevə işğal olunmamış əraziləri Rusiyaya verməsi üçün təzyiq göstərməyə başlamışdı”.

FP bildirir ki, Putinin Rusiyanın qaçılmaz qələbəsi barədə narrativi aşağıdakı yanlış iddialara əsaslanır:

- Ukrayna cəbhəsi dağılmaq ərəfəsindədir;

- Rusiya iddia etdiyi bütün əraziləri ələ keçirəcək;

- Rusiya qeyri-məhdud müddət ərzində müharibə aparmaq üçün kifayət qədər insan və resurslara malikdir;

- Ukrayna Rusiya ordusuna qalib gələ bilməz.

Nəşr vurğulayır ki, bu, sadəcə təbliğat deyil. Bu, Qərb liderlərinin düşüncələrini formalaşdırmaq və onları Rusiya üçün əlverişli, Ukrayna üçün isə əlverişsiz qərarlara sövq etmək məqsədi daşıyan bir “koqnitiv müharibə” sistemidir.