Rusiya Xarici İşlər Nazirliyinin rəsmi nümayəndəsi Mariya Zaxarova Azərbaycanın mülki təyyarəsinin raketlə vurulmasıyla bağlı məntiqsiz açıqlama verib. Birincisi, Zaxarova açıqlamasında təyyarənin raketlə vurulması ifadəsi əvəzinə Kremlin təlimatıyla “sərnişin təyyarəsinin qəzaya uğraması” cümləsinə üstünlük verib. İkincisi, Zaxarova deyib ki, guya Rusiya təyyarəylə bağlı əldə olunmuş bütün razılaşmaların icrası üzərində ardıcıl şəkildə işləyir. “Tərəflər aviaqəza kontekstində qalan bütün məsələlərin tənzimlənməsinə hədəflənib”, - deyə Zaxarova vurğulayıb.

Axar.az xəbər verir ki, bu sözləri politoloq Elxan Şahinoğlu qeyd edib.

“Yalandır. Rusiya razılaşmaların “icrası” üzərində necə işləyir ki, nə həlak olanların ailələrinə və yaralılara kompensasiya ödənilib, nə də təyyarəmizi raketlə vurmağı əmr edənlər cəzalandırılıb. Azərbaycan xarici işlər naziri Ceyhun Bayramovun isə bugünkü açıqlamasında “Rusiya tərəfindən mütəmadi addımların atılmasını gözləyirik. Bizim mövqeyimiz dəfələrlə ən ali səviyyədə qarşı tərəfə çatdırılıb” cümləsi Rusiyanın məsələnin həllini uzatmasına işarədir. Rusiya məsuliyyətdən yaxa qurtarmaq üçün vaxtı uzatmağa çalışır. Mariya Zaxarovanın açıqlaması bu qəbildəndir”, - o vurğulayıb.