Ermənistan hələlik Yaxın Şərqdəki vəziyyətin ciddi təsirini hiss etməyib, lakin qiymətlərin mümkün artımı da daxil olmaqla, iqtisadi nəticələr daha sonra özünü göstərə bilər.

Axar.az xəbər verir ki, bunu Ermənistan ticarət və sənaye palatasının vitse-prezidenti Karen İvanov deyib.

Onun sözlərinə görə, əsas risklər təchizat zəncirlərinin pozulması və dəniz nəqliyyatının artan qiymətləri ilə bağlıdır:

“Gəmi yükdaşıma tarifləri təxminən 30% artıb və bu, qaçılmaz olaraq, Ermənistan da daxil olmaqla, malların və xammalın son qiymətinə təsir edəcək. Logistika dövrləri olduqca uzun olduğundan təsir gecikmə ilə özünü göstərəcək. Orta hesabla, malların çatdırılması 30 gündən 40 günə qədər və ya daha çox çəkir, buna görə də mümkün qiymət artımları sonradan nəzərə çarpacaq. Ermənistanın bəzi yükləri artıq daşınma zamanı çətinliklərlə üzləşir. Xüsusilə, yüklərdən biri İranın Bəndər Abbas limanı əvəzinə Fələstində boşaldılıb. Bu, Ermənistan şirkətləri üçün real problemlər yaradır. İndi belə yüklərin geri qaytarılması məsələsi həll olunmalıdır”.

Rusiya və Yaxın Şərqdəki tərəfdaşların məlumatlarına istinadən İvanov əlavə edib ki, bir sıra malın qiyməti artıq artmağa başlayıb:

“İlkin hesablamalara görə, artım 15-20% təşkil edir, lakin bu tendensiya sürətlənə bilər. Ermənistan iqtisadiyyatı üçün əlavə risk, İrəvan üçün vacib ticarət tərəfdaşı olaraq qalan İrandan xammal tədarükünün azalması mümkündür. Ermənistan bazarı tezliklə bu məhdudiyyətlərin təsirini hiss etməyə başlayacaq və sahibkarlar alternativ xammal mənbələri və yeni logistika marşrutları axtarmalı olacaqlar. Ayrı bir problem alternativ yolların həddindən artıq yüklənməsidir. Münaqişə fonunda bəzi yük axınları Gürcüstan ərazisindən, xüsusən də Poti və Batumi limanlarından, eləcə də Yuxarı Lars-Kazbegi keçid məntəqəsindən quru yolu ilə istiqamətini dəyişir. Lakin bu limanların infrastrukturu daşıma həcmlərinin kəskin artımını idarə etmək üçün nəzərdə tutulmayıb, bu da növbələrə və gecikmələrə səbəb ola bilər. Əvvəllər Çindən gələn konteyner İran vasitəsilə orta hesabla 40-45 günə çatırdısa, indi bu müddət təxminən ikiqat arta bilər”.