ABŞ Prezidenti Donald Tramp sələfi Barak Obamanın İranla diplomatik əlaqələrə dair mövqeyini lağa qoyan və hazırkı yanaşmanı əks etdirən mem (yumoristik məzmunlu şəkil - red.) yayımlayıb.

Axar.az Oxu.az-a istinadla xəbər verir ki, o, kollajı özünə məxsus "Truth Social" platformasında paylaşıb.

Paylaşılan şəkilin üst hissəsində Obamanın İran rəsmilərinə böyük məbləğdə vəsait uzatdığı təsvir olunub. Alt hissəsində isə Trampın səmada uçuş həyata keçirən "B-2 Spirit" hərbi təyyarələrini izlədiyi görünür.

Memdə yuxarıda "Obama İranla danışıqlar aparır", aşağıda isə "Tramp İranla danışıqlar aparır" sözləri ironik müqayisə olaraq yazılıb.

Xatırladaq ki, fevralın 28-də İsrailin müdafiə naziri İsrael Kats İsrail Müdafiə Qüvvələrinin İrana qabaqlayıcı zərbə endirdiyini açıqlayıb. Daha sonra ABŞ Prezidenti Donald Tramp ölkəsinin də İrana qarşı hərbi əməliyyatda iştirak etdiyini bildirib.

İran isə öz növbəsində İsrailə onlarla ballistik raket atıb. İsrail Müdafiə Qüvvələri atışları təsdiqləyib, ölkə daxilində sirenlər səslənib və hava hücumundan müdafiə sistemləri işə salınıb.

Martın 1-də İranın Ali Lideri Əli Xameneinin hücumlar zamanı öldürüldüyü bəyan olunub.

İran ABŞ-nin hərbi bazalarının yerləşdiyi qonşu ölkələrin əksəriyyətinə raket zərbələri endirib. Buna görə də həmin ölkələrdə hava məkanı müvəqqəti bağlanıb.