Üçüncü ölkə aydındır – bu, Rusiyadır. Amma mən bunu anlamıram: bir insan deyir ki, AB-yə qəbul olunsa yaxşıdır, olunmasa da yenə qazanacaq. Belə insanlar adətən şahmatı öz-özləri ilə oynayıb qalib gəlirlər.

Axar.az xəbər verir ki, bunu Rusiya Xarici İşlər Nazirliyinin rəsmisi Mariya Zaxarova Ermənistan Baş naziri Nikol Paşinyanın AB-yə üzvlüklə bağlı çıxışını şərh edərkən deyib.

Onun sözlərinə görə, belə məntiq şübhə doğurur və Avropa standartlarının mütləq yaxşılıq kimi təqdim edilməsi Avropa Birliyi daxilində real vəziyyəti nəzərə almır.

Zaxarova AB-dəki iqtisadi çətinliklərə də toxunub – sənaye istehsalının azalması, dövlət borcunun artması, miqrasiya böhranı və enerji daşıyıcılarının bahalaşması kimi problemlərin vətəndaşların həyat səviyyəsinə təsir etdiyini bildirib.

O, həmçinin vurğulayıb ki, Ermənistanın Avropa standartlarını tətbiq etməyə çalışması qəribə görünür, çünki ölkə bu standartların hazırlanmasında iştirak etmir. Halbuki Avrasiya İqtisadi İttifaqı və MDB kimi qurumlarda Ermənistan qərarların qəbulunda tamhüquqlu iştirakçıdır:

“Ermənistan iqtisadiyyatı, hansı ki, ötən il orta dünya göstəricilərindən yüksək – 7–7,2%-dən çox artım nümayiş etdirib, böyük ölçüdə məhz Aİİ ilə ticarət-iqtisadi əlaqələrdən asılıdır”.

Sonda Zaxarova xatırladıb ki, Moskvanın mövqeyinə görə, Avropa və Avrasiya inteqrasiya layihələrində eyni vaxtda iştirak mümkün deyil:

“Bu, heç bir siyasi qiymətləndirmə ilə bağlı deyil – bu, Ermənistanın suveren seçimidir. Sadəcə faktın ifadəsidir”.

Qeyd edək ki, martın 11-də Avropa Parlamentində çıxış edən erməni baş nazir bildirmişdi ki, ölkə həm Avropa Birliyinə üzv olacağı halda, həm də sadəcə standartlarını Avropa standartlarına uyğunlaşdıracağı halda qazanacaq.