ABŞ-ın hava hücumundan müdafiə sistemləri İranın pilotsuz uçuş aparatlarının on hücumundan doqquzunu məhv edir. Lakin hədəfə çatan cəmi 10% “Şahid” belə qlobal təhlükəsizlik üçün kritik təhlükə yaradır. Bununla belə, ABŞ və Ukrayna qarşılıqlı faydalı əməkdaşlıq yolu tapa bilər.

Axar.az xəbər verir ki, bu fikri San Dieqo Dövlət Universitetinin beynəlxalq münasibətlər üzrə professoru Mixail Alekseyev bildirib.

Ekspertin sözlərinə görə, bir kamikadze dronunun qiyməti təxminən 25 min dollardır ki, bu da ABŞ və müttəfiqlərinin istifadə etdiyi tutucu raketlərlə müqayisədə yüz dəfə ucuzdur.

Professor qeyd edir ki, İran müharibədən əvvəl təxminən 80 min “Şahid” ehtiyatına malik idi və hələ də ayda təxminən 1000 ədəd istehsal edə bilir:

“ABŞ və müttəfiqləri isə qiymətli raket ehtiyatlarını çox sürətlə tükəndirir. Martın ortalarına qədər ABŞ hərbçiləri təxminən 1000 ədəd “Patriot” (PAC-3) raketi istifadə ediblər ki, bu da ölkədə illik istehsal həcmini iki dəfə üstələyir. Bu rəqəm Ukraynanın Rusiya ilə dörd illik genişmiqyaslı müharibə ərzində xərclədiyindən də çoxdur”.

O vurğulayıb ki, Ukraynanın təcrübəsi ABŞ-a daha mürəkkəb hədəflər üçün bahalı raketləri saxlamağa imkan verir.