Türkiyənin Suriyadakı hərbi əməliyyatları İŞİD-ə qoşulan qərbli terrorçuların Avropaya kütləvi axını ilə nəticələnə bilər.

Axar.az xəbər verir ki, bu barədə İngiltərənin nüfuzlu "İndependent" qəzetində məlumat verilib.

Məqalədə İŞİD-in son vaxtlarda ciddi ərazilər itirdiyi, təşkilat üzvlərinin isə hərbi əməliyyatlardan yorulduğu qeyd olunub:

"Bu səbəbdən minlərlə qərbli terrorçu yenidən Avropaya qayıda bilər. Təhlükəsizlik qüvvələrinin mümkün təhdidlərə qarşı ciddi hazırlığa başladığı da gələn xəbərlər arasındadır".

Bütün bunlara baxmayaraq, hazırda "cihadçı axını" yaşanmadığını yazan qəzet son 8 ayda İngiltərəyə geri dönən İŞİD-çilərin sayının bir əlin barmaq sayını keçmədiyini qeyd edib.

Suriyada müharibə başladıqdan sonra 27 mindən artıq əcnəbinin İŞİD-ə qoşulduğu, bunlardan 5-7 min nəfərinin Avropa ölkələrindən getdiyi təxmin edilir.