13-21 mart tarixləri arasında “Avropanın Nəbzi”nin (European Pulse”) apardığı sosioloji araşdırmaya görə, ABŞ Prezidenti Donald Tramp vəzifədə olduğu on səkkiz ay ərzində avropalıların ölkəsinə münasibətini kökündən dəyişdirə bilib. İndi AB ölkələrində əhalinin əksəriyyəti Amerikanı tərəfdaş deyil, Avropaya təhlükə kimi qəbul edir. Onlar Çindən daha çox ABŞ-dan qorxurlar. Lakin Trampın “səylərinə” baxmayaraq, görünür, o, Rusiyanı zirvə mövqeyindən sıxışdıra bilməyəcək: Moskva həmişə AB vətəndaşlarının nöqteyi-nəzərindən əsas təhlükə olub və olaraq qalır.

Axar.az xəbər verir ki, ümumilikdə 6698 nəfərin iştirak etdiyi sorğuya əsasən, ispanların 51%-i (və daha 16%-i onu rəqib hesab edir), italyanların 46%-i (18%-i onu rəqib hesab edir), belçikalıların 42%-i (25%-i onu rəqib hesab edir), fransızların 37%-i (29%-i onu rəqib hesab edir) və almanların 30%-i (32%-i onu rəqib hesab edir) ABŞ-ı Avropanın düşməni hesab edir.

“ABŞ-ı yaxın müttəfiq və tərəfdaş hesab edənlərin sayı xeyli azdır. ABŞ-ı yaxın müttəfiqi hesab etməyə ən az meyilli olanlar alman və belçikalılardır (hər biri 8%). Bu sorğuda Polşa fərqlənib, respondentlərin yalnız 13%-i ABŞ-ı Avropanın düşməni və ya rəqibi hesab edib. Bununla belə, polşalıların 34%-i Amerikanı tərəfdaş, 24%-i isə yaxın müttəfiq hesab edir. Lakin əhalisi ənənəvi olaraq amerikalılara çox rəğbət bəsləyən Polşa üçün ABŞ-dan narazı olanların hətta 13%-i belə yüksək rəqəmdir”, - məlumatda deyilib.