Avropa Birliyi NATO daxilində gərginliyin artması fonunda daha aktual olmuş qarşılıqlı yardım mexanizmi üzrə müqavilə maddəsinə əsaslanan imitasiya təlimləri keçirəcək.

Axar.az xəbər verir ki, bu barədə “Blumberq” agentliyi yazıb.

AB-nin yüksək vəzifəli nümayəndəsinin sözlərinə görə, bu təlimlər üzv dövlətlərdən birinin digər ölkələrdən hərbi dəstək istəməsi halında qərarların necə qəbul ediləcəyini simulyasiya edəcək. Təlimlər əvvəlcə Brüsseldə AB səfirlərinin iştirakı ilə keçiriləcək, daha sonra isə may ayında Kiprdə müdafiə nazirlərinin görüşündə davam etdiriləcək. Bu mövzu gələn həftə Kiprdə keçiriləcək qeyri-rəsmi liderlər sammitində də müzakirə olunacaq.

Qeyd olunur ki, bu addımlar ABŞ Prezidenti Donald Trampın NATO-dan çıxmaq təhdidləri və Danimarka ərazisi olan Qrenlandiyanı almaq istəyi fonunda transatlantik əlaqələrdə yaranmış çatlara Avropanın reaksiyasını göstərir.

“AB müqaviləsinin 42.7-ci maddəsində deyilir ki, əgər üzv dövlət öz ərazisində silahlı hücumun qurbanı olarsa, digər üzv ölkələr öz ixtiyarlarında olan bütün vasitələrlə yardım və dəstək göstərməyə borcludurlar.

Beləliklə, bu formulasiya NATO-nun əsasını təşkil edən 5-ci maddədən daha sərtdir. NATO-nun həmin maddəsinə görə, üzv ölkəyə edilən silahlı hücum digər üzvləri “zəruri hesab etdikləri tədbirləri” görməyə məcbur edir; bu tədbirlərə silahlı qüvvə tətbiqi də daxil ola bilər, lakin bu, məcburi deyil. Bununla belə, AB NATO kimi hərbi gücə və onu dəstəkləyən strukturlara malik deyil”, - nəşr vurğulayıb.

Qeyd etmək vacibdir ki, bu maddə yalnız bir dəfə – 2015-ci ildə Fransada baş vermiş terror aktlarından sonra tətbiq edilib. 2026-cı ilin əvvəlində Avropa Komissiyasının sədri Ursula fon der Leyen bu maddənin daha fəal istifadəsinə çağırıb.