Yunanıstan hakimiyyəti İon dənizindəki Lefkada adası sahillərində dəniz dronunun aşkarlanmasından sonra Ukraynadan rəsmi izahat tələb edib.

Axar.az xəbər verir ki, bu barədə CNN nəşri yazıb.

Qeyd olunur ki, Afina bunu “ciddi vəziyyət” adlandırır və Aralıq dənizində gəmiçiliyin təhlükəsizliyinə təhdid olduğunu bildirir.

Yunanıstanın müdafiə naziri Nikos Dendias bəyan edib ki, Kiyev gələcəkdə bu cür halların təkrarlanmaması ilə bağlı təminat verməlidir:

“Ukrayna bizdən ən səmimi şəkildə üzr istəməlidir. Üzr istəməklə yanaşı, bu regionda belə hadisələrin bir daha təkrarlanmayacağına dair bizə tam təminat verməlidir”.

Qeyd edək ki, mayın 8-də Lefkada adasının cənub sahilləri yaxınlığında dəniz dronu aşkar edilib. Yerli hakimiyyət orqanlarının məlumatına görə, qurğu Ukraynanın “Magura V3” tipli dəniz dronu kimi identifikasiya olunub.