Rusiya Silahlı Qüvvələrinin 6-cı ordusunun 69-cu diviziyasının 83-cü alayının bir qrup hərbçisi Ukrayna ordusuna könüllü əsir düşüb.

Axar.az xəbər verir ki, bununla bağlı yayılan görüntülərdə rusların Ukrayna dronuna əsir düşdükləri görünür.

Əsir düşən hərbçilər bəyanat da yayıblar. Müraciətlərində hərbçilər Rusiya komandanlığının onları ölümə göndərdiyini və imtina edəcəkləri təqdirdə hərbi xidmətlərini “sıfırlayacaqları” ilə hədələdiyini bildiriblər.

Onların sözlərinə görə, mövqelərində təslim olmaq barədə təlimatları olan bir vərəqə tapıblar və silahlarını yerə qoyaraq təslim olublar.

Hərbçilər ruslara hərbi xidmət barədə müqaviləni imzalamamağı, müharibəyə getməməyi və cəbhədə olanlara isə təslim olmağı məsləhət görüblər.

"Əgər belə bir vərəqə görsəniz, təlimatlara əməl edin. Hər şey yaxşı olacaq: pilotsuz təyyarə gələcək, sizi təhlükəsiz şəkildə müşayiət edəcək, sizi qarşılayacaqlar və sizə içki verəcəklər" - deyə, əsgərlərdən biri qeyd edib.