Müharibədən əvvəlki status-kvonun Hörmüz boğazı ilə bağlı bərpa olunması artıq mümkün deyil.

Axar.az xəbər verir ki, bu barədə Oman nümayəndələri avropalı rəsmilərə bildiriblər.

“Blumberq”in öz mənbələrinə istinadən yaydığı məlumata görə, boğazdan keçən neft tankerləri müəyyən ödənişlər etməyə məcbur ola bilərlər.

Qeyd olunur ki, Oman rəsmiləri beynəlxalq dəniz hüququna həmişə əməl edəcəklərini bildirsələr də, boğazın təmizlənməsi, gəmilərin təhlükəsiz naviqasiyasına yardım göstərilməsi və digər əlaqəli xidmətlər üçün rüsum tətbiq edə biləcəklərini qeyd ediblər. Hələlik bu ödənişlərin məcburi olub-olmayacağı dəqiq deyil.

Bildirilir ki, Oman və İran dünyanın neft və mayeləşdirilmiş təbii qaz daşımaları üçün ən mühüm dəniz yollarından biri olan Hörmüz boğazına nəzarət edən ölkələrdir. Hazırda ABŞ və İran sülh danışıqları aparırlar və Tehran Hörmüz boğazında gəmi hərəkətinin Omanla birgə idarə olunmasını tələb edir.

Mütəxəssislərin fikrincə, gəmilərin hərəkətində baş verəcək istənilən gecikmələr xammal treyderləri və dəniz daşımaları şirkətləri üçün hər il on milyardlarla dollar əlavə xərc yarada bilər. ABŞ, Böyük Britaniya, Fransa, Səudiyyə Ərəbistanı və Birləşmiş Ərəb Əmirlikləri də daxil olmaqla, bir sıra ölkələrin hökumətləri isə belə addımların beynəlxalq dəniz hüququnu poza biləcəyi barədə xəbərdarlıq ediblər.