2018-ci ilin ortalarında Çin ABŞ-da keçirilən ara seçkilərin nəticələrinə və daha sonra 2020-ci il prezident seçkilərinin nəticələrinə təsir göstərmək üçün çalışırdı.

Axar.az xəbər verir ki, bunu ABŞ Prezidenti Donald Tramp keçirdiyi mətbuat konfransı zamanı deyib.

“Çin hökuməti mənim 2020-ci il seçkilərində uduzmağımı istəyirdi, çünki mən onlara tariflər tətbiq etmişdim. 18 ştatda on milyonlarla seçicinin məlumatları Çin tərəfindən satın alınıb, oğurlanıb və ya haker hücumuna məruz qalıb. Ölənlər seçici siyahılarında aktiv şəxslər kimi qeyd olunub.

Rusiya, Çin, İran və Şimali Koreya da daxil olmaqla, ABŞ-ın rəqibləri ABŞ seçki infrastrukturunu pozmaq qabiliyyətinə malikdirlər.

Bu çıxışımı işıqlandırmayan televiziya kanallarının lisenziyaları ləğv edilməlidir”, - o bildirib.

Qeyd edək ki, ABŞ Daxili Təhlükəsizlik Departamenti və Kibertəhlükəsizlik və İnfrastruktur Təhlükəsizliyi Agentliyi Rusiya, İran və Çinin hakerlərinin 2016-cı ildən bəri dəfələrlə amerikalı seçicilərin məlumat bazalarına qanunsuz daxil olmağa cəhd göstərdiklərini açıqlayıb.